ភ្នំពេញ៖ ឯកអគ្គរាជទូតចក្រភពអង់គ្លេសលោក Dominic Williams បានសំដែងនូវអារម្មណ៍រីករាយដែលបានចូលរួមក្នុងពិធីប្រគល់វត្ថុបុរាណដែលបានលួកពីប្រទេសកម្ពុជា មកកម្ពុជាវិញនៅព្រឹកនេះ។

លោក Dominic បានសរសេរលើហ្វេសបុកផេកលោកនៅថ្ងៃទី១៧ ខែមីនានេះថា លោកពិតជាសប្បាយរីករាយដែលបានចូលរួមពិធីប្រគល់វត្ថុបុរាណដែលបានលួចពីប្រទេសកម្ពុជា រួមទាំងវត្ថុបុរាណចំនួន ៧៧បំណែក ដែលត្រឡប់មកពីចក្រភពអង់គ្លេសនាពេលថ្មីៗនេះ។

លោកសរសេរថា៖ «វាជាឯកសិទ្ធិពិតប្រាកដដែលអាចឃើញវត្ថុដ៏ស្រស់ស្អាតទាំងនេះដែលមានអត្ថន័យវប្បធម៌ជ្រៅដូចនេះមកវិញនៅលើទឹកដីកម្ពុជា»។

កាលពីថ្ងៃទី១៧ ខែកុម្ភៈ ឆ្នាំ២០២៣ គ្រឿងអលង្ការបុរាណខ្មែរធ្វើពីមាសនិងលោហៈមានតម្លៃទាំងធំ-តូច ចំនួន ៧៧គ្រឿង ត្រូវបាននាំយកពីចក្រភពអង់គ្លេសមកដល់កម្ពុជា ដោយក្រុមការងារកម្ពុជាដឹកនាំដោយ លោក ហ៊ុន ម៉ានី។

ក្រសួងបានគូសបញ្ជាក់ថា ក្នុងចំណោមសម្បត្តិវប្បធម៌ខ្មែរដែលទទួលបានមកវិញនេះ មានរូបបដិមាសំខាន់ៗមួយចំនួនផ្នែកព្រហ្មញ្ញ សាសនា និងពុទ្ធសាសនា ព្រមទាំងគ្រឿងអលង្ការបុរាណ ក្នុងសម័យមុនអង្គរ និងសម័យអង្គរ ជាពិសេស បដិមា ថ្មធំៗដូចជា៖ ព្រះឥសូរនិងព្រះស្កន្ទ ព្រះស្កន្ទគង់លើក្ងោក និងព្រះគណេស ដែលមានប្រភពដើមមកពីរមណីយ ដ្ឋានប្រាសាទកោះកេរ អតីតរាជធានីនៃអាណាចក្រខ្មែរនៅសតវត្សរ៍ទី១០ នៃគ.ស. ដែលធ្លាប់ជាគោលដៅនៃការលួចទ្រង់ទ្រាយធំអស់ជាច្រើនឆ្នាំនៅក្នុងអំឡុងនៃសម័យសង្គ្រាមស៊ីវិល និងអសន្តិសុខក្នុងស្រុក៕